Taaguutit nassuiaatillu
Suliffinni naatsorsuutini taaguutit atorneqartut spørgeskemami allaqqasunik tunngaveqarput. Spørgeskemami nittartakkatsinni uani: www.stat.gl –imi aaneqarsinnaavoq.
Kaaviiaartitat: Suliffeqarfiup suliani ingerlataani pingaarnerni nioqqutissanik tuniniaanermi sullissinernilu isertitat. Sulianik nammineerluni akilikkanik aamma imaqarpoq.
Ingerlatsinermi isertitat allat: Isertitat pingaarnertut ingerlatsinermut attuumassuteqanngitsut, soorlu ilinniarnermut atatillugu suliffimmiittoqarnermi tapiissutit tigussaasunillu sanaartornermi pigisani sinneqartoorutit.
Nioqqutissanik atuineq: Atuineq kaaviiaartitanut ilaatinneqartoq. Tassaniipput nioqqutissiassanik, nioqqutissanik ineriikkanik aammalu toqqorsivinni allannguinerit.
Akissarsiat, soraarnerussutisiat allallu: Akissarsianut soraarnerussutisiassanullu aningaasartuutit aammalu suloqarnermut aningaasartuutit allat.
Appartitsinerit nalikilliliinerillu: Ukiumi pineqartumi tigussaasunik tigussaanngitsunillu sanaartornikkut pigisani nalikilliliinerit appartitsinerillu.
Nalinginnaasumik aningaasartuutit allat: Ineqarnermut akiliutinut, annikitsunik pisatartaarnernut, sinniisuusartut allaffiinut, piffissami sivisuumi attartornernut atortunullu nammineq piginngisanut atuinernut, aningaasartuutinut avataaneersunut allanut allanut aningaasartuutit, taamatuttaaq aningaasartuutinut ilanngunneqarput aningaasartuutit pingaaruteqannginnerusut.
Aningaasaqarnikkut isertitat: Erniat, pappiaqqanit aningaasanik nalilinnit nunanilu allani taarsigassarsisitsinernit iluanaarutit, aktiaatinit piginneqataanermilu iluanaarutit il.il.
Aningaasaqarnikkut aningaasartuutit: Erniat, pappiaqqanik aningaasanik nalilinnik nunanilu allani taarsigassarsisitsinerni nalikilliliinermi annaasat, tuniniaasup akissarsiassaanut toqqorsivinnullu aningaasartuutit il.il.
Naleqarnerulersitsineq: Kaaviiaartitat ingerlatsinermilu isertitat allat nioqqutissanik sullissinernillu atuinermut aningaasartuutit ilanngaatigereerlugit. Naleqarnerulersitsineq allatut taallugu tassaavoq suliaqarfimmi nalilinnik pilersitsineq.
Sanaartornermi pigisat: Aningaasaatit pineqartut suliffeqarfimmi ataavartumik piginnittuunissamut atuisuunissamullu aalajangersagaapput, assersuutigalugu illunut, maskiinanut, pisattanut, teknikikkut atortunut, akuersissutinut aammalu qarasaasiami programminut najoqqutassanullu.
Kaaviiaartitani pigisat: Nioqqutissanut toqqorsiviit, aningaasaatini tigoriaannarni pigisat, tuniniaanermi pisassat pappiaqqallu aningaasanik nalillit.
Namminerisamik aningaasaatit: Piginnittut aningaasaatini agguagarsiassaat. Pigisat tamakkerlugit illuartitat akiitsullu ilanngaatigalugit kisinneqarpoq.
Illuartitat:Pisussaaffiit, annertussusaat imaluunniit piffissaq akiliiffissaq kingulleq qularnaarlugu ilisimaarineqanngitsoq, assersuutigalugu akileraarutit kinguartinneqarsimasut aammalu soraarnerussutisiassanut pisussaaffiit.
Akiitsut sivisuumik akilersugassat: Akiitsut ukioq ataaseq sinnerlugu akilerneqartussat, assersuutigalugu taarsigassarsiat tulleriiaakkat.
Akiitsut piaartumik akiligassat: Akiitsut ukiup ataatsip ingerlanerani akilerneqartussat.
Aningaasaliinerit: Sanaartornermi pigisani amerleriarnerit ikileriarnerillu, soorlu illuutini (toqqaviit, illut il.il.), ingerlatsinermi atortuni (maskiinat, qamutit, pisattat il.il.) pigisanilu tigussaanngitsuni (qarasaasiami programmit najoqqutassallu il.il.). Amerleriarnerni nalikilliliinnginnermi pisinermi akinik naleqqussaanernillu allanit naatsorsorneqarput, pisianillu aammalu nammineq piginngisanik attartornermi pigisanik aamma imaqarlutik.
Sulisut: Akissarsiaqarlutik suliffeqarfimmi sulisut. Ukiumoortumik amerlassusaat.
Nammineq aningaasaatinik ernialersuineq = (Akileraarusereerlugit inernerit/Agguaqatigiissillugu nammineq aningaasaatit)*100. uani agguaqatigiissillugu nammineq aningaasaatit kisinneqarput (aallartinnerani nammineq aningaasaatit + naalernerani nammineq aningaasaatit)/2.
Sinneqartoorutit annertussusaat= (Nalinginnaasumik inernerit/Kaaviiaartitat)*100.
Annaasaqarnermi akiliisinnaassutsip annertussusaa= (Nammineq aningaasaatit/Pigisat tamakkerlugit)*100.
Akiliisinnaassuseqarnerup annertussusaa (Current ratio) = (Kaaviiaartitani pigisat/Akiitsut piaartumik akiligassat)
Pisassani kaaviiaartitat ingerlaarnerat = Kaaviiaartitat ilanngaanneqareersut / Agguaqatigiissillugu pigisat.